Tertulia Literarioaren hurrengo saioa izango da urriaren 30ean Tolosan. Oraingo honetan, Lizar Begoña, idazle Sopelarra etorriko da bere ‘Mundu zitalaren kontra’ eleberriaren inguruan hitz egitera.
Tertulia literarioa, 19:00etan hasiko da Tolosako Kultur Etxean (Lehenengo solairuko Gazte Topagunean) eta Yurre Ugarte izango da saioaren dinamizatzailea.
“Kiosko bat Benidormen, hondartzako pasealekuaren aurrean, garai batean egunkariz eta bezeroz mukuru, gaur egun ahazturaren eta dekadentziaren ikur bihurtua. Eta bertan bi emakume lanean, goiz eta arratsaldeko txandetan: Pilar, XX. mende erditsuan kioskoa ireki zuen arrantzalearen alaba, ahizpa zahar elbarriarekin bizi dena; eta neska gazte bizkaitar izenik gabeko bat, udan lantxo bat izateko hara joana, bere barruko lainoengandik ihesi akaso. Bi bakardade paraleloren kontaketaren bidez, egungo gizartearen erretratu zorrotz bat egiten du egileak: identitate lausoak, harreman zehaztugabeak, helburu eta esperantza argirik gabe noraezean ibiltzea… Lizar Begoñak begirada eta estilo propioak erakusten ditu Igartza sariari esker idatzitako bere lehenengo eleberri honetan.