• “Eta euskaraz egiten badugu?” lelopean hasi da gaur Mintzapraktikako izen-emate kanpaina Tolosaldean.
• Mintzalagun taldeetan euskara praktikatzen da, pertsonen arteko harreman berriak sortu eta indartuz.
• Azken urteetan, 100 bat pertsonek hartu dute parte eskualdean eta ia 8.000 pertsonek Euskal Herrian.

Ikasturte hasierarekin batera, Mintzalagun egitasmoaren izen emate kanpaina aurkeztu da gaur Amasa-Villabonan. Bertan izan dira egitasmoa bultzatzen duten udaletako ordezkariak zein hitza hartu duten, Maite Arregi, Villabonako Euskara Teknikaria eta Igor Agirre, Galtzaundi Euskara Taldeko kidea. Asko dira euskarazko oinarri bat izan bai, baina praktikan jartzeko aukerarik ez dutenak. Beraz, partaideek, Mintzalagun taldeetan aurkitzen dute euskaraz lagun artean aritzeko aukera.

 Eman izena

Egin nahi duzun hori, egizu euskaraz

Tolosaldeko Mintzalaguna egitasmoak ikasturte berriari ekin dio. Egin nahi duzun hori, euskaraz egiteko gonbidapena luzatu nahi dizuegu. Mintzalagunak lagunartean, modu eraginkorrean eta giro ezin hobean euskara praktikatzeko eta ondo pasatzeko aukera eskaintzen du, eta aurten ere martxan jartzera goaz.

Irailean ikasturtea hastearekin batera, Mintzalagun talde berriak sortuko dira. Tolosan, Ibarran, Zizurkilen, Anoetan, Iruran eta hemen bertan Amasa-Villabonan. Badira taldeak dagoeneko, eta nahi genuke Bidelagunak eta Bidelariak eskualdeko herri gehiagotan ere elkartzea. Mintzalagunean, Bidelariak eta Bidelagunak astero elkartzen dira, eta astero izaten dute elkarri zer kontatua, zertaz hitz egina, giro atseginean. Astean ordu betez, hizketaldi lasaian, Bidelagunek euskara praktikatzea dute helburu, lotsa gaindituz, akatsak egiteari beldurra kenduz, hizkuntza ohiturak aldatuz eta erabileran urratsak emanez. Bidelagunei, berriz, euskara partikatu nahi duen bati laguntzearen pozak betetzen dio barrua, euskararen alde zerbaitetan ari dela ikustea, eta, gainera, ondo pasatzen ari dela.

Asteroko zitaz gain, ikasturtean zehar ekintza osagarriak ere antolatzen dira, betiko taldeaz gain, Mintzalagunean parte hartzen ari diren gainerakoekin batera: urtero eskualdeko bertako herriren batean bisita gidatu bat egiten da. Iaz Fagus, Alkizako interpretazio zentrora egin zen bisita eta duela bi urte, Amezketara joan ginen, Pello Zabala gunera. Eskualdetik ere ateratzen gara, Durangoko Azokara, sagardotegira, eta aurten ere izango dira antzerako ekintza osagarriak.

Euskaraz soltura izan ez, eta soltura hori lortu nahi duten ia 100 mintzalagun ditugu Tolosaldean 20 talde pasatxotan banatuta. Eta begirada altxatuz gero, Euskal Herri osoan ia 8 000 mintzalagun gara. Asko gara, eta gehiago izateko asmoz gaude aurten, Egin nahi duzun hori, egizu euskaraz lelopean.

Eman izena Galtzaundin edo Tolosaldeko udal guztietan

Eta ohiko Mintzalagunean izena emateko Galtzaundin eman dezakezue izena, baita Tolosaldeko udal guztietan ere. Zuen herriko udalean bertan, alegia. Bertaratu, deitu edo idatzi lasai, zalantzarik izanez gero galdetu, eta ez galdu aukera. Informazio gehiago udaletako webguneetan aurkituko duzue, baita Galtzaundiren webgunean ere.

Egin nahi duzun hori, egizu euskaraz, MINTZALAGUNA.